荔園 10 大景點逐個捉

荔園遊樂場有限公司今日公布，將於 6 月 26 日至 9 月初，於中環龍和道新海濱活動空間，舉辦荔園 Super Summer 2015 活動，將荔園重現大家眼前。

今次活動係免費入場，但想玩遊戲當然就要購買代幣啦！10 大景點設施，ezone.hk 同你逐個捉，原來不少景點，都有新增科技元素！

01：荔園城堡（免費）

邊個去過荔園請舉手？記者小時候都去過（扮細），還記得一入大門口有個大城堡，大門中央就有兩隻紅色大字「荔園」。

呢個標誌性城堡，都會在 Super Summer 2015 重現，塔頂保留紅、藍、綠三色設計，左右兩邊1門頂部展示老虎標記。邊度搵到？好易搵，因為城堡會作為今次 Super Summer 嘅門口，高 10 米，一定見到！

02：吸蕉大笨象

大笨象都可以話係荔園另一個標記，今次嘉年華會有吸蕉大笨象，仲話會結合科技元素，化身成機械 TINO！呢個「癲佬」咀部可以自動開合，俾入場人士餵假香蕉！大會又會提供假香蕉，食完仲會自動排便！

03：滑稽恐龍屋

恐龍屋以為好驚？見到「滑稽」兩個字就知驚極有限。參照當年恐龍世界而設計，現在變成 5 米高滑梯。

04：魔靈小學

睇個名就知驚！場景有地下大堂、走廊、洗手間及課室，真人亡靈會走來走去；佔地 100 平方米。不得不提，呢間「小學」採用擴增實境（AR）、LED 影像及投影技術作輔助；玩家又可以下載《魔靈小學》手機 App，用「降靈符」收伏校園內的亡靈。懷舊 x 科技，正呀喂！

05：吹漲動物園

去荔園睇動物係常識，咁今年「新荔園」又有無動物睇呢？有，不過係氣球動物，真係「吹漲」！此區利用超過 60,000 個全天然及環保橡膠製作，以氣球設計的動物取代真動物，有獅子、老虎、大象、長頸鹿等。相信呢個區域，會成為龍友必到的景點。

06：夏日溜冰場

上次中環新海濱搞歐陸嘉年華，有溜冰場，model 沙律都玩得好開心！但今次係 Super Summer，夏天戶外點玩溜冰？大會就話係用「假雪」製造冰場，佔地 200 平方米，會有 4 款溜冰輔助器，款式包括：長頸鹿、馬、老虎及大象。

07：經典掟階磚

經典掟階磚，即係大家熟悉的「掟香口膠」！佔地 38 平方米，大會就話不擲界就有經典綠箭香口膠及香口膠紀念品。喂，近年大家好似鍾意食乜乜 wave 又或者乜乜 tra 香口膠，經典綠箭唔知會唔會重此 hit 一輪呢？

08：淘氣小木馬

好簡單，即係旋轉小木馬，大人細路都合玩！每分鐘轉動 3 個圈，每節人數可以容納 36 人！嘩，睇嚟有機會排長龍喇！

09：好時光收集箱（免費）

佔地 120 平方地的貨櫃及佔地 100 平方米的露天活動區，區內有 4 個特色景點，包括：光影及展覽區、藝術區、露天活動區及科技區。首先，光影及展覽區會播放影片及擺設舊物，展示昔日荔園及香港舊生活，帶埋小朋友去「話當年」就正喇！

藝術區就會展出本地創作家的藝術作品；露天活動區就會舉行不同活動及展出昔日木馬，大會木馬係 50 年代出品，夠曬舊！

科技區有乜？竟然係有得玩 Xbox One，哈，哈，哈！

10：荔園大舞台（免費）

最後景點係荔園大舞台，估地 2,000 平方地，可容納 1,000 人，有乜表演睇呢？大會暫時未有公布。

活動資料

名稱：荔園 Super Summer 2015

主辦單位：荔園遊樂場有限公司

地點：中環龍和道 9 號中環海濱活動空間

舉行日期：2015 年 6 月 26 日至 9 月初

開放時間：上午 11 時至晚上 11 時

佔地：超過 2 萬平方米

入場收費：免費入場；參與遊戲須購買代幣 代幣收費：$10/個；遊戲收費介乎 1 至 10 個代幣。 

原文刊於：ezone.hk